اسلام ٹائمز 16 Oct 2021 گھنٹہ 0:59 https://www.islamtimes.org/ur/news/958915/برطانوی-رکن-پارلیمنٹ-چاقو-بردار-شخص-کے-حملے-میں-ہلاک -------------------------------------------------- ٹائٹل : برطانوی رکن پارلیمنٹ چاقو بردار شخص کے حملے میں ہلاک -------------------------------------------------- پولیس کا کہنا ہے کہ جائے وقوعہ سے ایک چاقو ملا تھا جب کہ عینی شاہدین کی مدد سے 25 سالہ حملہ آور کو تعاقب کے بعد حراست میں لے لیا گیا تاہم ابھی ملزم کی شناخت ظاہر نہیں کی گئی۔ متن : اسلام ٹائمز۔ برطانیہ میں حکمراں جماعت کے رکن پارلیمنٹ ڈیوڈ امیز چاقو بردار کے حملے میں شدید زخمی ہونے کے بعد دوران علاج دم توڑ گئے۔ عالمی خبر رساں ادارے کے مطابق برطانیہ میں بیلفیئرز میتھوڈسٹ کے ایک چرچ میں حکمراں جماعت سے تعلق رکھنے والے رکن اسمبلی ڈیوڈ امیز کو ایک حملہ آور نے تیز دھار چاقو کے پے در پے وار کرکے شدید زخمی کردیا۔ 69 سالہ برطانوی رکن پارلیمنٹ کو شدید زخمی ہونے پر اسپتال منتقل کیا گیا جہاں دوران علاج انھوں نے دم توڑ دیا۔ ڈیوڈ امیز کے ساتھی رکن پارلیمنٹ نے الزام عائد کیا ہے کہ حملے کے دو گھنٹے بعد تاخیر سے اسپتال منتقلی ہلاکت کا باعث بنی۔ پولیس کا کہنا ہے کہ جائے وقوعہ سے ایک چاقو ملا تھا جب کہ عینی شاہدین کی مدد سے 25 سالہ حملہ آور کو تعاقب کے بعد حراست میں لے لیا گیا تاہم ابھی ملزم کی شناخت ظاہر نہیں کی گئی۔ ڈیوڈ امیز اپنے حلقے کے ووٹرز سے رابطہ مہم کے سلسلے میں چرچ پہنچے تھے۔ رکن اسمبلی کو فوری طور پر اسپتال منتقل کردیا گیا ہے جہاں انھیں طبی امداد فراہم کی جا رہی تھی۔