1
Tuesday 27 Jul 2021 14:30

صراط مستقیم از پیامِ غدیر 

صراط مستقیم از پیامِ غدیر 
تحریر: شاہد عباس ہادی

تاریخی واقعات سے پتہ چلتا ہے کہ بنی اسرائیل کے انبیاء جس دن اپنا جانشین منتخب کرتے، اس دن کو عید کا دن قرار دیتے اور وہ دن خوشی و مسرت کا عظیم دن کہلایا جاتا تھا۔ 18 ذی الحجہ کا دن بھی وہ عظیم دن ہے، جس دن رسول ختمی مرتب صلی الله عليه وآله وسلم نے امیر المؤمنین حضرت علی علیہ السلام کو جانشین مقرر فرمایا اور تمام اصحاب سے کہا کہ حضرت علی (ع) کو مبارک دیں، چنانچہ اصحاب رسول نے "ھنیئا لك يا أميرالمؤمنين أصبحت مولى کل مؤمن و مؤمنة" کہہ کر مولا علی (ع) کو مبارکباد دی۔ (مسند احمد، جلد ۴، ص ۲۸۱) یہ عید صرف اہل تشیع سے مخصوص نہیں، غیر شیعہ علماء نے بھی اس روز کی فضیلت اور پیغمبر اکرم (ص) کی طرف سے حضرت علی (ع) کے مقام ولایت و خلافت پر فائز ہونے کی گفتگو کی ہے۔

لہذا بیرونی ”الآثار الباقیة“ میں روز غدیر کو ان دنوں میں شمار کرتے ہیں، جن کو مسلمانوں نے عید قرار دیا ہے۔ ابن طلحہ شافعی کہتے ہیں: ”حضرت امیر المومنین علیہ السلام نے اپنے اشعار میں روز غدیر خم کا ذکر کیا ہے اور اس روز کو عید شمار کیا ہے، کیونکہ اس روز رسول اسلام (ص) نے آپ کو جانشین منصوب کیا اور تمام مخلوقات پر فضیلت دی ہے۔ نیز کہتے ہیں: ”لفظ مولا کا جو معنی بھی رسول اکرم (ص) کے لئے ثابت ہے، وہی حضرت علی علیہ السلام کے لئے بھی معین ہے، یہ ایک بلند مرتبہ اور عظیم منزلت ہے، جو پیغمبر اکرم (ص) نے حضرت علی علیہ السلام سے مخصوص کی، لہٰذا اولیائے الہیٰ کے نزدیک یہ دن عید اور مسرت کا روز قرار پایا ہے۔“ (مطالب السؤول ص 54)

تاریخی کتب (طبری، تفسیر کبیر، سیرت ہشام وغیرہ) سے یہ نتیجہ حاصل ہوتا ہے کہ امت اسلامیہ مشرق و مغرب میں اس دن کے عید ہونے پر متفق ہے۔ مصری، مغربی عراقی و ایرانی اس روز کی عظمت کے قائل ہیں، لہذا عالم اسلام کے نزدیک غدیر مسلمانوں کیلئے عید کا دن ہے۔ اس کا انکار کرنا ان سوفسطانیوں کی طرح ہے، جنہوں نے واقعیت کے موجود ہونے کا انکار کیا یا جنہوں نے جنگ بدر و احد کا انکار کیا ہے، کیونکہ پوری تاریخ اسلام میں کوئی بھی ایسا حکم یا الہیٰ دستور نہیں ملتا جو اتنے تفصیلی مقدمات اور اہتمام کے ساتھ بیان کیا گیا ہو، سوائے غدیر خم پر عھد ولایت و امامت کے، یعنی تپتے صحراء میں دھوپ کی شدید طمازت کے باوجود حاجیوں کے سوا لاکھ مجمع کو یکجا جمع کرنا اور رسول اکرم (ص) کا ایک طولانی خطبہ بیان کرنا صرف ایک حکم کے لیے، یہ اس بات کی واضح دلیل ہے کہ اسلام کا یہ الہیٰ حکم دیگر تمام احکامات سے ممتاز اور انتہائی اہمیت کا حامل ہے۔

ہماری ذمہ داری ہے کہ غدیر کے پیغامات کو عملی جامہ پہنائیں، غدیر کا پہلا پیغام یہ ہے کہ حق بیانی کرنے میں کبھی مت گھبرائیں، حق کا ہاتھ بلند کریں اور لوگوں کو بتائیں کہ صراط مستقیم یہ ہے، اسی لئے امت مسلمہ میں ایسا رہبر ہونا چاہیئے، جو ظلم و نفاق کا راستہ روکے اور امت کو صراط مستقیم پر گامزن رکھے۔ آج دنیا کی سب سے بڑی طاقتیں اسلام کے خلاف کھڑی ہیں اور پورا زور لگارہی ہیں کہ دین اسلام کو جڑ سے ختم کیا جائے، امریکہ و اسرائیل اپنے خونی لشکروں کی مدد سے پوری طاقت لگا رہا ہے۔ داعش و القاعدہ اور پوری دنیا کی افواج اسلام مخالف کھیل کھیل رہی ہیں، برطانیہ و فرانس اور صیہونی طاقتیں دینی مقدسات کی توہین کروا کر شدت پسندی و دہشتگردی کی آگ کو بھڑکا رہی ہیں۔

ہمارا رہبر ان طاقتوں کے مدمقابل میدان میں کھڑا ہے، وہ اسرائیل و امریکہ و دیگر ہر طاقت کو جواب دے رہا ہے اور ظلم و نفاق کا راستہ روک رہا ہے، ہمارا رہبر دنیا کی شیطان پرست طاقت نہیں ہے، ہمارا رہبر ولی فقیہ زماں ہے، ہمارا رہبر مظلومین جہاں کا حامی ہے۔ وہ دین اسلام کی حقیقی تصویر دکھاتا ہے، وہ صراط مستقیم پر گامزن رکھتا ہے، وہ مظلومین جہاں کا رہبر ہے۔ لہذا غدیر کا تقاضہ ہے عالم اسلام میں رونما ہونے والے واقعات کے سلسلے سے ہم اپنی ذمہ داری کو پہچانیں، جہاں کہیں بھی مسلمانوں پر ظلم ہو رہا ہے، اس کی مخالفت کریں اور مظلوموں کا ساتھ دیں، یمن و فلسطین میں بڑی طاقتوں کے ایماء پر معصوم بچوں کو نشانہ بنایا جا رہا ہے، ان سب کے بارے ہمیں سمجھنے کی ضرورت ہے کہ ہماری ذمہ داری کیا ہے اور ہم کیا کرسکتے ہیں۔؟ 
خبر کا کوڈ : 945392
رائے ارسال کرنا
آپ کا نام

آپکا ایمیل ایڈریس
آپکی رائے

منتخب
ہماری پیشکش