1
Sunday 12 Jul 2020 00:00

مزاحمتی فورسز کے "نشانے کے عین اوپر مار کرنیوالے" راکٹ اسرائیلی شہروں کو تباہ کر سکتے ہیں، صیہونی اخبار

مزاحمتی فورسز کے "نشانے کے عین اوپر مار کرنیوالے" راکٹ اسرائیلی شہروں کو تباہ کر سکتے ہیں، صیہونی اخبار
اسلام ٹائمز۔ ایک اسرائیلی اخبار نے اعتراف کرتے ہوئے لکھا ہے کہ فلسطینی غزہ کی پٹی میں موجود مزاحمتی فورسز اور لبنانی مزاحمتی فورس حزب اللہ کے پاس "اپنے ہدف کے عین اوپر مار کرنے والے" لاتعداد راکٹس موجود ہیں جو اسرائیلی شہروں کو راکھ کے ڈھیر میں بدل سکتے ہیں۔ تفصیلات کے مطابق صیہونی اخبار "یدیعوت آہارانوٹ" نے اپنے اداریئے کے اندر لکھا ہے کہ فلسطینی و لبنانی مزاحمتی تحریکوں کے "ہدف کے عین اوپر مار کرنے والے" راکٹس جو سینکڑوں کلوگرام دھماکہ خیز مواد سے بھرے ہیں، اسرائیل کے بڑے شہروں کی تمام عمارتوں کو تباہ کرنے کی صلاحیت رکھتے ہیں۔

صیہونی اخبار نے اس حوالے سے اسرائیلی ریسکیو فورس کے کمانڈر "یوسی بینٹو" سے نقل کرتے ہوئے لکھا ہے کہ اسرائیلی فوج نے کچھ روز قبل ہی مزاحمتی فورسز کے "نشانے کے ٹھیک اوپر مار کرنے والے" راکٹس کے حوالے سے منفرد ریسکیو مشقیں انجام دی ہیں۔ اسرائیلی ریسکیو فورس کے کمانڈر نے بتایا کہ ان فوجی مشقوں کے اندر مزاحمتی فورسز کے "ٹھیک نشانے پر مار کرنے والے" راکٹس کے ذریعے تباہ فرض کی جانے والی 2 عمارتوں میں سے زخمی و ہلاک شدہ فوجیوں کو باہر لانے کی ریہرسل کی گئی ہے۔

واضح رہے کہ 2 ہفتے قبل ہی فلسطینی مزاحمتی فورس حماس کے ذیلی بریگیڈ "القسام" کی جانب سے مذموم الحاقی منصوبے پر اسرائیل کو متنبہ کرنے کے لئے سمندر کے اندر 10 میزائل فائر کئے گئے تھے۔ دوسری طرف غاصب صیہونی رژیم کے حکمرانوں کا بھی یہی خیال ہے کہ فلسطینی و لبنانی مزاحمتی فورسز اپنے راکٹس کو بہتر سے بہتر بنا رہی ہیں جو اسرائیلی وجود کے لئے کسی بھی دوسرے خطرے سے کم نہیں۔

یاد رہے کہ فلسطینی مزاحمتی فورس القدس بریگیڈ کے ترجمان ابوحمزہ نے بھی گذشتہ جمعرات کے روز "البنیان المرصوص" آپریشن کی سالگرہ کے حوالے سے تاکید کرتے ہوئے کہا تھا کہ اس کے پاس ایسے طاقتور راکٹ موجود ہیں جو مقبوضہ فلسطین (اسرائیل) کے تمام شہروں کے اندر موجود فوجی و حساس مقامات کو تباہ کرنے کی صلاحیت رکھتے ہیں۔
خبر کا کوڈ : 873891
رائے ارسال کرنا
آپ کا نام

آپکا ایمیل ایڈریس
آپکی رائے

منتخب
ہماری پیشکش